Höfundar: ©Notendur ljóð.is |
Vei, vei, yfir hinni föllnu borg!
Hvar eru þín stræti,
þínir turnar,
og ljóshafið, yndi næturinnar?
Eins og kórall í djúpum sjó
varst þú undir bláum himninum,
eins og sylgja úr drifnu silfri
hvíldir þú á brjóstum jarðarinnar.
Vei, vei!
Í dimmum brunnum vaka eitursnákar,
og nóttin aumkvast yfir þínum rústum.
Jóreykur lífsins þyrlast til himna,
menn í aktygjum,
vitstola konur í gylltum kerrum.
- Gefið mér salt að eta, svo tungan skorpni í
mínum munni
og minn harmur þagni.
Á hvítum hestum hleyptum við upp á bláan
himinbogann
og lékum að gylltum knöttum;
við héngum í faxi myrkursins,
þegar það steyptist í gegnum undirdjúpin;
eins og tunglsgeislar sváfum við á bylgjum
hafsins.
Hvar eru þau fjöll, sem hrynja yfir mína sorg,
hálsar, sem skýla minni nekt með dufti?
Í svartnætti eilífðarinnar flýgur rauður dreki
og spýr eitri.
Sól eftir sól hrynja í dropatali
og fæða nýtt líf og nýja sorg.
|
|
|
|
Ljóð eftir Jóhann Sigurjónsson
Sorg (2001-11-20)
Bikarinn (2002-04-01)
Sofðu, unga ástin mín (2002-02-21)
Viltu fá minn vin að sjá? (2003-05-21)
Haustfífillinn (2003-08-21)
Heimþrá (2004-12-19)
Fyrir utan glugga vinar míns (2008-05-03)
Væri ég aðeins einn af þessum fáu (2008-02-05)
Jónas Hallgrímsson (2008-11-16)
Tárið (2008-03-03)
Ég sótti upp til fjallanna (2008-04-04)
[ Til baka í leit ]
|
