24. mars 2017
 





















Notandi

Lykilorð


[ Gleymt lykilorð ]

Höfundar:
A B C D E F G H I J K L M N O P Q R S T U V W X Y Z Æ Þ Ö

©Notendur ljóð.is
 
Umsagnir

Gler leikur að orðum eftir Hrafn Andrés Harðarson.


Ánægjuleg lesning - athyglisverðir orðaleikir.


Ljóðabókin Þríleikur að orðum eftir Hrafn Andrés Harðarson kom út árið 1990. Sjálfur titillinn felur í sér loforð um tvær bækur til viðbótar, og fyrir stuttu kom út önnur bókin í þessum þríleiks Hrafns, Gler leikur að orðum.

 

Á sama tíma og orðaleikir fara fram er sviðsljósinu bent að glerinu. Skáldið skoðar hvernig glerið kemur okkur fyrir sjónir í ýmsum birtingarmyndum dags daglega, en veltir einnig fyrir sér hliðstæðum glers í óbeislaðri náttúrunni. „Hvað ef ekki væri til neitt gler?“ er lesandinn spurður að í einu ljóðanna, eflaust spurning sem fáir hafa velt fyrir sér, né áttað sig á hversu gler er mikilvægur þáttur í tilveru okkar.

 

Þrátt fyrir að glerið sé í aðalhlutverki er komið víða við og skáldið bregður upp myndum af fortíðinni, tímanum, húsáhöldum, ástinni og tröllum, ásamt þeirri náttúrulýrík sem virðist flæða í gegnum allt verkið, og á köflum fer fram glíma við efnislega veröld manneskjunnar. Mitt á milli og í bland við allt saman er verið að leika sér að orðum, oftast á skemmtilegan hátt.

 

Hér er á ferðinni ágætis ljóðabók. Flest ljóðin hitta vel í mark og ná tilætluðum árangri, hvort sem það er að fá lesandann til umhugsunar eða til að glotta við tönn. Sjálfur þóttist ég verða var við jörðun skáldsögunnar, heimsósóma og fleira í bókinni, en það eru túlkunaratriði sem hver og einn verður að gera upp við sig. Það besta við þessa bók Hrafns er að ljóðin bjóða uppá margvíslega túlkun og að mínu mati er það grundvöllur að góðri lýrík. Ljóðakver sem er ánægjuleg lesning og skemmtir fólki um leið með athyglisverðum orðaleikjum.


Hver er það sem gefur umsögn:

Ólafur Solimann, 2004.